કોણ કરી રહ્યું છે રસ્તા પર લટાર મારતાં વનરાજને હેરાન

સાસણ-ગીરમાં એશિયાટીક સિંહોને હેરાન કરવામાં આવતા હોવાના વીડિયો અવારનવાર સામે આવતા હોય છે. ત્યારે સિંહની પજવણીનો વધુ એક વીડિયો સામે આવ્યો છે. આ વીડિયો ધારી નજીક આંબરડી રોડનો છે, જ્યાં એક કાર ચાલકે સિંહને નજીકથી નિહાળવા માટે કાર રિવર્સમાં ચલાવી હતી તેમજ કાર ચાલક સિંહને દોડાવી રહ્યો છે. સિંહ દર્શનની આ રીતે વિકૃત મઝા માણવાનો વીડિયો સામે આવ્યા બાદ ફરી એકવાર સાસણમાં સિંહોની સલામતી સામે સવાલ ઊઠી રહ્યા છે.

આ અંગે મળતી વિગતો અનુસાર અમરેલી જિલ્લાના ધારીમાં એક સાવજ રસ્તા ઉપરથી પસાર થઈ રહ્યો હતો ત્યારે એક કાર ચાલકે આ સિંહને જોતાં તેમાં બેઠેલાં લોકોએ તેને નજીકથી નિહાળવા માટે ગાડી ઊભી રાખી હતી. ત્યારબાદ સિંહ નજીક આવ્યો અને પસાર થયો તો આ ગાડી ચાલકે પોતાની ગાડી રિવર્સમાં લઈને સિંહને દોડાવ્યો હતો અને સાથે મોબાઈલ પર વીડિયો રેકોર્ડિંગ પણ કરતા હતા. આ પ્રકારે સિંહની પજવણી કરીને તેને દોડાવવાના મામલાનો વીડિયો સોશિયલ મીડિયામાં વાઈરલ થતાં વન વિભાગ પણ ચોંકી ઉઠ્યું હતું.

આ મામલે જ્યારે સિંહ પ્રેમી અને વાઈલ્ડ લાઈફના નિષ્ણાત મનીષ વૈદ્યને પૂછવામાં આવ્યું ત્યારે તેમણે Khabarchhe.com ને જણાવ્યું હતું કે, વન વિભાગની નિષ્ક્રિયતાના કારણે લોકો સિંહોને જોવા માટે આ પ્રકારના નુસ્ખા અપનાવતાં હોય છે. વન્યજીવને ખોટી રીતે હેરાન પરેશાન કરતાં લોકો સામે કાયદાની જોગવાઈ હોવા છતાં પણ વન વિભાગ દ્વારા કોઈ પગલાં આજદિન સુધી લેવાયા નથી તેના કારણે આવા લોકોની હિંમત વધતી જાય છે. તેમણે માગણી કરી હતી કે, આ પ્રકારે સિંહો કે અન્ય વન્ય જીવોને પરેશાન કરતાં લોકો સામે રાજ્ય સરકાર અને વનવિભાગે કડકહાથે કામગીરી કરવી જોઈએ

#LatestGujaratiNews#TrendingNewsinGujarat#LatestNewsinGujarati#GujaratiNews#PoliticalnewsinGujarati#SocialNewsinGujarati#GujaratSamachar#Khabarchhe#KhabarchheNews#Lions#SasanGirForest#ForestDeparment

સમાચાર