नगरच्या झेडपीत पुन्हा एकदा महिलाराज

जिल्हा परिषद आरक्षणाची सोडत मंगळवारी मुंबईमध्ये काढण्यात आलीय.नगर जिल्हा परिषदेचे अध्यक्षपद महिलांसाठी खुले आहे. त्यामुळे विद्यमान अध्यक्षा शालिनीताई विखे पुन्हा अध्यक्षपदाच्या दावेदार राहू शकतात अर्थात राज्यात दोन्ही काँग्रेस आणि शिवसेना एकत्र आल्यास वेगळा बदल सुद्धा पाहायला मिळू शकतो. जानेवारीमध्ये जिल्हा परिषदेच्या अध्यक्ष आणि उपाध्यक्षांची निवड होणार आहे. जिल्हा परिषदेत सध्या काँग्रेस आघाडीची सत्ता आहे. काँग्रेसचे २३ सदस्य आहेत; मात्र, यामध्ये सर्वाधिक १३ सदस्य विखे यांना मानणारे आहेत आणि राहिलेले १० सदस्य थोरात गटाचे आहेत. राष्ट्रवादी काँग्रेसचे १९ सदस्य आहेत. याशिवाय भाजप १४, शिवसेना ७, क्रांतिकारी शेतकरी पक्ष ५, महाआघाडी २, भाकप १, जनशक्ती १ आणि अपक्ष १ असे एकूण ७३ सदस्य आहेत. जिल्हा परिषदेच्या ७३ सदस्यांमध्ये तब्बल ३९ महिला सदस्य आहेत. अध्यक्षपद सर्वसाधारण महिला प्रवर्गासाठी खुले असल्याने या सर्व महिला या पदावर दावेदारी करू शकतात. मात्र, यातही काही नावे जास्त चर्चेत आहेत. विद्यमान अध्यक्ष विखे अजून काँग्रेसमध्येच असल्याने त्याही पुन्हा या पदावर येऊ शकतात. याशिवाय राजश्री घुले, सुवर्णा जगताप, प्रभावती ढाकणे, राणी लंके, सुनीता भांगरे, अनुराधा नागवडे, अनिता हराळ, सुप्रिया झावरे, तेजश्री लंघे, भाग्यश्री मोकाटे, सुषमा दराडे अशीही काही प्रमुख सर्वपक्षीय नावे चर्चेत आहेत. मात्र बहुमतासाठीच्या ३७ सदस्य संख्येचा आकडा कोण गाठत, यावर अध्यक्षपद अवलंबून आहे.

Watch नगरच्या झेडपीत पुन्हा एकदा महिलाराज With HD Quality

#News#Metro

बातम्या